Willemstad: 23 di novèmber 2009
Un Bunita Gesto di Desiree, Nadin, Daida & tur nos spònsernan
‘Make-over’ di kas di Famia Tomasa na Seru di Fortuna
WILLEMSTAD – Dia 3 di ougùstùs 2009 Famia Tomasa su kas na seru di Fortuna a kima. For di tur skina di Kòrsou instansianan i famianan a yuda famia Tomasa. Nos di Grupo Un Bon Gesto a aserká famia Tomasa pa mira kiko nos por kaba di yuda nan kuné. Nos a bai wak e kas i Nadin Benito di Interior Visions a pensa mesora pa hasi un ‘make-over’ di e kas pa e famia. Tambe nos a kana rònt wak kiko mas nos lo por yuda e famia kuné. I nos a kuminsá aserka hopi negoshi pa pidi yudansa pa famia Tomasa.
Djasabra dia 21 di novèmber mainta tempran Grupo un Bunita Gesto a yega na kas di famia Tomasa i ku mikrofon ku sirena nos a lanta nan for di soño. I mesora e promé sorpresa a yega, 2 taksi Hummer a bin buska nan. Ora nan a yega Curaçao Breezes Resort tabata otro sorpresa pa nan. Atardi e taksinan Hummer a bai buska nan na Curaçao Breezes Resort pa hiba nan kas. Ora e famia a drenta nan kas i mira kiko nos a hasi pa nan, Señora Tomasa a kuminsá yora i nos tur a yora mirando kon emoshoná el a bira. I nos a sinti nos hopi bon di por a duna famia Tomasa un dia inolvidabel i trese hopi felisidat den nan bida, ku nan por pasa un Bon Pasku i habri aña 2010 felis!
Gratuitamente nos a haya un kontratista pa kaba di traha e balkon dilanti di e kas, Paula’s schilderbedrijf a kaba di fèrf e kas, Graphic desinger Marchena ku a pinta un bunita angel riba e muraya den e komedor, Sicni Fransisca di taksi # 74 (e promé taxi Hummer na Kòrsou) ku a transportá e famia den 2 Hummer pa Curaçao Breezes Resort, Norbert Meulens, Day passes pa famia Tomasa di Curaçao Breezes Resort, elèktrishèn Nahr, Sin Paulina, kamarógrafo Roy Hamudez pa e produkshon, Tele-Curacao i tur e negoshinan ku a duna nos mobilario i merkansia pa e kas di famia Tomasa.
Nos a risibí kasi tur mobilario pòrnada serka diferente muebleria, tambe plaka efektivo i nos a disidí pa yuda un otro famia ku e restu di plaka. E instanshanan òf personanan ku ta interesá pa yuda nos pa nos por yuda mas famia den nesesidat por tuma kontakto ku nos via nos e-mail: gesto20092010@hotmail.com
Desiree Da Costa Gomez, Nadin Benito, Daida Da Silva Coelho, Elvis Schoop i Wouter Den Boer ta forma parti di Grupo Un Bon Gesto. Daida Da Silva Coelho ta accountant di profeshon i naturalmente accountant di nos grupo.
E filmashon di “Un Bunita Gesto di Desiree, Nadin, Daida & tur nos Spònsernan” lo pasa na Tele-Curacao dia 14 desèmber pa 6.30 anochi.
UN DANKI DI KURASON NA TUR PERSONA I NEGOSHI KU A YUDA NOS HASI UN BUNITA GESTO PA FAMIA TOMASA!!!
|
